Insor Hike

In Unfong seimor zu Fuaß mit dor onderen Gruppe zusammen bis zum Hotel Pfösl gongen. Zem seimor nett empfongen wordn, hom eps u trinken gekreg und don homor die Kischt abkolt und hom ins in Inholt aufgetoalt. Nor homor ins getrennt und mir sein Richtung Deitschnofen umigongen. Auf Holbweg zu Petersberg hot ins zum Glück an Auto mitgnummen. In Petersberg homor glei amol die gesuchte Busholtestell gfundn und hom noch longen Bemühen es Quiz glöst. Don seimor aufi Richtung Weissenstein gongen. Mir hom wiedr so Glick kob, dass ins a Auto mitgnummen hot, nochdem mor die Hälfte zu Fuaß gongen sein. Don seimor zur Laab Alm aufigschtartet wo mor don die andere Sippe getroffen hobn. Mir hom insor Abendessn, die Nudel, gekocht. Bold mor fertig gschpeist und des ahgschpialt und aufgraumt hom seimor die 2 Zelter mittlt af dor Wies aufstelln gongen. Nochor homor es Fuaßbollspiel übern Radio verfolgt und die Gitschn sein af die Alm in Fernseher es Fuaßballspiel schaugn gongn und hobn mit die freindlichen Wirte unterholtn. Bold sie wieder in die Zelte oikemmen sein hom die Buabn schun gepennt. Um holbe ochte seimor don so longsom aufgschtondn und hom a super Frühstück gekreg. Spater homor gmiasn helfn und hom Holz zomgeklaub. Noamol spater homor eigentlich in Weiher putzen gwellt, aber es Lama hot sein Revier verteidigt und hot Unzochn gmocht ins unzuschpuckn, also seimor liaber wieder Holz zommensommeln gongen. Dornoch homor a geniales super Mittogessen gekreg, mit Würstln, Polenta und a Stelze. Dornoch seimor es Zuig und  die Zelte zompockn gongen und noch Kaffee und Kuchn homor ins 10 x bedonkt für die Gastfreunschaft und sein wieder Richtung Deitschofen oigschtartet, wohin mor ca. 1 Stunde gebraucht hobn. Und jetz nochdem mor ins die Kreizor ungschaug hobn seimor afn Weg zum Logerplotz.